Ashok Kharat News Update: नाशिकमधील बहुचर्चित भोंदू बाबा अशोक खरात याच्या अडचणी संपण्याचे नाव घेत नाहीत. विशेष तपास पथकाद्वारे (SIT) सुरू असलेल्या सखोल चौकशीदरम्यान खरातची प्रकृती अचानक बिघडल्याने पोलीस प्रशासनाची मोठी धावपळ उडाली. प्रकृतीचे गांभीर्य ओळखून पोलिसांनी तातडीने कार्डियाक ॲम्बुलन्स पाचारण केली आणि त्याला वैद्यकीय उपचार पुरवले.
नेमकं काय घडलं?
अशोक खरात सध्या पोलीस कोठडीत असून एसआयटीकडून त्याची कसून चौकशी केली जात आहे. मिळालेल्या माहितीनुसार, चौकशी सुरू असतानाच खरातला अचानक मळमळ आणि उलट्यांचा त्रास सुरू झाला. त्यानंतर त्याने तीव्र डोकेदुखी आणि छातीत दुखत असल्याची तक्रार केली. आरोपीची प्रकृती खालावल्याचे पाहून पोलिसांनी त्वरित हालचाली केल्या. खबरदारीचा उपाय म्हणून कार्डियाक ॲम्बुलन्स मागवण्यात आली आणि काही काळ त्याला ऑक्सिजनवरही ठेवण्यात आले होते. या घटनेमुळे पोलीस ठाण्याच्या परिसरात काही काळ तणावाचे वातावरण निर्माण झाले होते.
बड्या हॉटेल व्यावसायिकाची ६ तास चौकशी
दुसरीकडे, एसआयटीने या प्रकरणातील आर्थिक धागेदोरे शोधण्यासाठी आपला मोर्चा शहरातील बड्या धेंडांकडे वळवला आहे. अशोक खरातचे कुणाकुणाशी आर्थिक हितसंबंध आहेत, याचा शोध घेण्यासाठी नाशिकमधील एका नामांकित हॉटेल व्यावसायिकाला चौकशीसाठी बोलावण्यात आले होते. तब्बल ६ तास चाललेल्या या चौकशीत खरातसोबत केलेले संशयास्पद जमीन व्यवहार आणि मोठ्या रकमांची देवाणघेवाण यावर प्रश्नांची सरबत्ती करण्यात आली. या चौकशीतून अनेक धक्कादायक माहिती समोर येण्याची शक्यता वर्तवण्यात येत आहे.
उद्या पुन्हा न्यायालयात हजर करणार
अशोक खरातवर फसवणूक आणि अंधश्रद्धा पसरवल्याप्रकरणी गंभीर गुन्हे दाखल आहेत. त्याची पोलीस कोठडी उद्या संपत आहे. त्यामुळे कोठडीची मुदत संपण्यापूर्वी जास्तीत जास्त पुरावे गोळा करण्यासाठी एसआयटीने तपासाचा वेग वाढवला आहे. उद्या त्याला पुन्हा एकदा न्यायालयात हजर केले जाणार असून, तपासाची मर्यादा आणि नवीन खुलासे पाहता पोलीस त्याची कोठडी वाढवून देण्याची विनंती करण्याची दाट शक्यता आहे.
खरातच्या या प्रकरणाने नाशिकच्या राजकीय आणि व्यावसायिक वर्तुळात मोठी खळबळ उडाली आहे. आता न्यायालय काय निर्णय घेते आणि या चौकशीतून आणखी कोणती मोठी नावे समोर येतात, याकडे सर्वांचे लक्ष लागले आहे.
